హైదరాబాద్ వెలుతురు జూలై 09:
లైంగిక నేరాల నుండి పిల్లల రక్షణ (పోక్సో) చట్టం కింద నమోదైన కేసులో బండి సాయి బగీరత్కు తెలంగాణ హైకోర్టు గురువారం షరతులతో కూడిన బెయిల్ మంజూరు చేసింది. మే 16న సైబరాబాద్ పోలీసులు అరెస్టు చేసిన తర్వాత, చెర్లపల్లి సెంట్రల్ జైలులో 51 రోజుల జ్యుడిషియల్ కస్టడీలో ఉన్న బగీరథ్కు బెయిల్ మంజూరైంది.
ఇద్దరు పూచీదారులతో లక్ష రూపాయల వ్యక్తిగత హామీ పత్రం సమర్పించాలని హైకోర్టు అతడిని ఆదేశించింది. కొనసాగుతున్న దర్యాప్తుకు సహకరించాలని, వారానికి రెండుసార్లు పేట్బషీరాబాద్ పోలీస్ స్టేషన్ హౌస్ ఆఫీసర్ ఎదుట హాజరు కావాలని, సాక్షులను ప్రభావితం చేయడం గానీ, సాక్ష్యాలను తారుమారు చేయడం గానీ చేయవద్దని, కోర్టు అనుమతి లేకుండా తెలంగాణ విడిచి వెళ్లవద్దని కూడా ఆదేశించింది. కోర్టు విధించిన నిబంధనలకు, షరతులకు కట్టుబడి ఉండాలని స్పష్టం చేసింది.