ఢిల్లీలో అగ్నిప్రమాదం

• బీకేదత్ కాలనీలో విషాద ఘటన
• మంటలను అదుపులోకి తెచ్చిన అగ్నిమాపక సిబ్బంది
• షార్ట్ సర్క్యూట్ కోణంలో దర్యాప్తు
• ప్రమాదానికి గల కారణాలపై ఆరా తీస్తున్న పోలీసులు

హైదరాబాద్ వెలుతురు జూలై 21:

దేశ రాజధాని ఢిల్లీలోని బీకేదత్ కాలనీలో మంగళవారం విషాదకర అగ్నిప్రమాదం చోటుచేసుకుంది. ఓ నివాస గృహంలో ఒక్కసారిగా మంటలు చెలరేగడంతో ఇంట్లో చిక్కుకున్న మహిళతో పాటు ఇద్దరు చిన్నారులు ప్రాణాలు కోల్పోయారు. ఈ ఘటన స్థానికంగా తీవ్ర విషాదాన్ని నింపింది. సమాచారం అందుకున్న వెంటనే అగ్నిమాపక సిబ్బంది, పోలీసులు సంఘటనా స్థలానికి చేరుకుని మంటలను అదుపులోకి తీసుకువచ్చారు.

తీవ్రంగా వ్యాపించిన మంటలను అదుపులోకి తెచ్చిన అనంతరం ఇంట్లో చిక్కుకున్న ముగ్గురిని బయటకు తీసే ప్రయత్నం చేసినప్పటికీ,  అప్పటికే ఇంట్లో చిక్కుకున్న మహిళ, ఇద్దరు చిన్నారులు ప్రాణాలు కోల్పోయినట్లు అధికారులు వెల్లడించారు. అగ్నిప్రమాదం ఎలా జరిగింది, షార్ట్‌ సర్క్యూట్ కారణమా.? లేదా ఇతర కారణాలున్నాయా.? అనే కోణంలో అధికారులు దర్యాప్తు చేపట్టారు.  ప్రమాదం సంభవించిన సమయంలో ఇంట్లో మరెవరైనా ఉన్నారా అనే అంశాన్ని కూడా పోలీసులు పరిశీలిస్తున్నారు.

ఈ ఘటనతో బీకేదత్ కాలనీలో విషాద వాతావరణం నెలకొంది. మృతుల కుటుంబ సభ్యులను స్థానికులు పరామర్శిస్తూ ప్రగాఢ సానుభూతి వ్యక్తం చేశారు. దర్యాప్తు పూర్తయిన తర్వాత అగ్నిప్రమాదానికి గల ఖచ్చితమైన కారణాలను అధికారులు వెల్లడించే అవకాశం ఉంది.