హకీంపేట ఎడ్యుకేషన్ హబ్ పనులు వేగవంతం చేయండి

• ప్రతి నెలా పురోగతిని నేనే సమీక్షిస్తా.. అవసరమైతే సైట్‌లోనే బస చేస్తా 
•  వికారాబాద్ జిల్లా హకీంపేటలో ఎడ్యుకేషన్ హబ్ పనులను క్షేత్రస్థాయిలో పరిశీలన
• నిర్మాణ పనులు మందకొడిగా సాగడంపై అధికారులపై తీవ్ర అసంతృప్తి
• ఇంజినీరింగ్, మెడికల్, నర్సింగ్, వెటర్నరీ, ఫిజియోథెరపీ కళాశాలల పనులపై సమీక్ష
• ప్రతి ప్రాజెక్టు పురోగతిని ఇకపై నెలనెలా తనిఖీ చేస్తానని స్పష్టం
• అవసరమైతే నెలలో ఒక రోజు నిర్మాణ ప్రాంతంలోనే బస చేస్తానన్న సీఎం
• పనుల్లో అలసత్వం ప్రదర్శిస్తే సస్పెన్షన్లకు వెనుకాడొద్దని ఉన్నతాధికారులకు ఆదేశం
• ఎడ్యుకేషన్ హబ్‌ను రాష్ట్రంలో అత్యుత్తమ విద్యా కేంద్రంగా తీర్చిదిద్దాలని సూచన
• భూములు కోల్పోయిన రైతులకు ప్లాట్ల కేటాయింపులో జాప్యంపై ఆగ్రహం
• వచ్చే వారంలోగా లబ్ధిదారులకు ప్లాట్ల పట్టాలు అందజేయాలని ఆదేశం
• క్షేత్రస్థాయి పరిశీలన అనంతరం అధికారులతో సమగ్ర సమీక్ష నిర్వహించిన ముఖ్యమంత్రి

వికారాబాద్‌ వెలుతురు జూలై 21:

వికారాబాద్‌ జిల్లా దుద్యాల మండలంలోని హకీంపేటలో  ప్రతిష్ఠాత్మకంగా నిర్మిస్తున్న ఎడ్యుకేషన్ హబ్ పనులను ముఖ్యమంత్రి రేవంత్ రెడ్డి మంగళవారం క్షేత్రస్థాయిలో పరిశీలించారు. నిర్మాణ పనులు ఆశించిన వేగంతో సాగడం లేదని అసంతృప్తి వ్యక్తం చేసిన ఆయన, ఇకపై ప్రతి నెలా పనుల పురోగతిని స్వయంగా సమీక్షిస్తానని స్పష్టం చేశారు. అవసరమైతే నెలలో ఒక రోజు నిర్మాణ ప్రాంతంలోనే బస చేసి పనులను పర్యవేక్షిస్తానని తెలిపారు.

ఎడ్యుకేషన్ హబ్‌లో రూ.600 కోట్ల వ్యయంతో నిర్మిస్తున్న ఇంజినీరింగ్, మెడికల్, నర్సింగ్, వెటర్నరీ, ఫిజియోథెరపీ, పారా మెడికల్ కళాశాలలు, హాస్టళ్ల నిర్మాణాలను పరిశీలించిన సీఎం పలు సూచనలు చేశారు. పనుల్లో నిర్లక్ష్యం ప్రదర్శించే అధికారులపై కఠిన చర్యలు తీసుకోవాలని, అవసరమైతే సస్పెండ్ చేయడానికీ వెనుకాడొద్దని ఉన్నతాధికారులను ఆదేశించారు.

భూములు కోల్పోయిన రైతులకు ప్లాట్ల కేటాయింపులో జాప్యం జరగడంపై కూడా ఆయన ఆగ్రహం వ్యక్తం చేశారు. వచ్చే వారంలోగా లబ్ధిదారులకు ప్లాట్ల పట్టాలు అందజేయాలని అధికారులను ఆదేశించారు. అనంతరం ఎడ్యుకేషన్ హబ్ అభివృద్ధి పనులపై అధికారులతో సమగ్ర సమీక్ష సమావేశం నిర్వహించారు.