భవనం పైనుంచి దూకి సాఫ్ట్ వేర్ ఉద్యోగి ఆత్మహత్య
హైదరాబాద్, వెలుతురు అక్టోబర్ 19 : షేర్ మార్కెట్‌లో భారీగా నష్టపోవడంతో మనస్తాపానికి గురైన హైదరాబాదుకు చెందిన ఓ సాఫ్ట్‌వేర్ ఉద్యోగి ఆత్మహత్య చేసుకున్నాడు. మూడు నెలల క్రితమే వివాహమైన ఆ యువకుడు జీవితంపై విరక్తితో భవనంపై నుంచి దూకి ప్రాణాలు విడిచాడు. ఈ హృదయ విదారక ఘటన చైతన్యపురి పోలీస్ స్టేషన్ పరిధిలో జరిగింది.
వివరాల్లోకి వెళితే… తమ్మిశెట్టి ప్రవీణ్ (34) అనే వ్యక్తి సాఫ్ట్‌వేర్ ఉద్యోగిగా పనిచేస్తున్నాడు. అతనికి మూడు నెలల క్రితమే వివాహమైంది. కొంతకాలంగా ప్రవీణ్ షేర్ మార్కెట్‌లో పెట్టుబడులు పెడుతున్నాడు. అయితే, ఇటీవల మార్కెట్‌లో నష్టాల కారణంగా అతను పెట్టిన డబ్బులు మొత్తం పోగొట్టుకున్నాడు. దీంతో తీవ్రమైన మానసిక ఒత్తిడికి గురయ్యాడు.
భారీ నష్టాల విషయం కుటుంబ సభ్యులకు, బంధువులకు తెలిస్తే పరువు పోతుందని తీవ్రంగా మదనపడ్డాడు. ఈ క్రమంలోనే ఆత్మహత్య చేసుకోవాలని నిర్ణయించుకుని, చైతన్యపురిలోని ఓ భవనంపై నుంచి కిందికి దూకేశాడు. తీవ్ర గాయాలపాలైన ప్రవీణ్ అక్కడికక్కడే మృతి చెందాడు.
సమాచారం అందుకున్న చైతన్యపురి పోలీసులు వెంటనే ఘటనా స్థలానికి చేరుకున్నారు. మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు. అనంతరం, ఈ విషయాన్ని కుటుంబ సభ్యులకు తెలియజేశారు. పోలీసులు కేసు నమోదు చేసి దర్యాప్తు ప్రారంభించారు. ఈ ఘటనతో ప్రవీణ్ కుటుంబంలో తీవ్ర విషాద ఛాయలు అలముకున్నాయి.