సుమారు 340 మిలియన్ టన్నుల బొగ్గు ఉత్పత్తికి లభించిన అవకాశం
- మరో 40 సంవత్సరాల పాటు సింగరేణి మైనింగ్ కార్యకలాపాలకు భరోసా
- వేలాది మంది నిరుద్యోగులకు దక్కనున్న కొత్త ఉద్యోగ అవకాశాలు
- భూపాలపల్లి ప్రాంత సామాజిక, ఆర్థిక అభివృద్ధికి లభించనున్న ఊతం
- రాష్ట్ర ప్రభుత్వ విజ్ఞప్తిపై సానుకూలంగా స్పందించిన కేంద్ర ప్రభుత్వం
- ప్రధానమంత్రి నరేంద్ర మోదీకి తెలంగాణ ప్రభుత్వం హృదయపూర్వక ధన్యవాదాలు
- కేంద్ర బొగ్గు, గనుల శాఖ మంత్రి కిషన్ రెడ్డికి కృతజ్ఞతలు తెలిపిన రాష్ట్రం
- సింగరేణి బలోపేతం కోసం మిగిలిన బొగ్గు బ్లాకులను కేటాయించాలని కోరిక
- తెలంగాణ పారిశ్రామిక రంగానికి పెద్ద శుభపరిణామంగా నిలిచిన నిర్ణయం
- కేంద్ర ప్రభుత్వానికి ధన్యవాదాలు తెలిపిన భట్టి విక్రమార్క
హైదరాబాద్ వెలుతురు జూలై 08:
తెలంగాణ ప్రజా ప్రభుత్వం గత రెండేళ్లుగా సాగించిన నిరంతర కృషికి పెద్ద విజయం దక్కింది. రాష్ట్ర పరిధిలోని ప్రతిష్టాత్మక సింగరేణి కాలరీస్ సంస్థకు తాడిచర్ల-2 బొగ్గు బ్లాక్ను కేటాయిస్తూ కేంద్ర ప్రభుత్వం నిర్ణయం తీసుకుంది. ఈ కేటాయింపు రాష్ట్ర పారిశ్రామిక రంగానికి ఎంతో శుభపరిణామమని తెలంగాణ ప్రభుత్వం హర్షం వ్యక్తం చేసింది. ప్రజా ప్రభుత్వం నిరంతరం జరిపిన సంప్రదింపుల వల్లే సింగరేణికి ఈ మైనింగ్ హక్కులు లభించాయని స్పష్టం చేసింది.
తాజాగా కేటాయించిన తాడిచర్ల-2 బొగ్గు బ్లాక్ ద్వారా సుమారు 340 మిలియన్ టన్నుల బొగ్గు ఉత్పత్తికి భారీ అవకాశం లభించనుంది. దీనివల్ల మరో 40 సంవత్సరాల పాటు సింగరేణి మైనింగ్ కార్యకలాపాలకు ఎటువంటి ఢోకా లేకుండా బలమైన భరోసా లభించినట్లయింది. ఈ భారీ మైనింగ్ ప్రాజెక్టు ద్వారా వేలాది మంది యువతకు కొత్తగా ఉద్యోగ, ఉపాధి అవకాశాలు లభించనున్నాయి. అంతేకాకుండా, ఈ బ్లాక్ పరిధిలోకి వచ్చే భూపాలపల్లి ప్రాంతం సామాజికంగా, ఆర్థికంగా మరింత వేగంగా అభివృద్ధి చెందడానికి ఇది ఎంతగానో దోహదపడుతుందని ప్రభుత్వం పేర్కొంది.
తెలంగాణ ప్రజా ప్రభుత్వ విజ్ఞప్తిని సానుకూలంగా పరిగణించి, తాడిచర్ల-2 బ్లాక్ను సింగరేణికి కేటాయించినందుకు గాను గౌరవ ప్రధానమంత్రి నరేంద్ర మోదీకి రాష్ట్ర ప్రభుత్వం తరఫున హృదయపూర్వక ధన్యవాదాలు తెలియజేశారు. అలాగే, ఈ ప్రక్రియలో చొరవ చూపిన కేంద్ర బొగ్గు, గనుల శాఖ మంత్రి జి. కిషన్ రెడ్డికి కూడా తెలంగాణ ప్రభుత్వం ప్రత్యేక కృతజ్ఞతలు తెలిపింది. భవిష్యత్తులో సింగరేణి సంస్థను మరింత బలోపేతం చేయడం కోసం, రాష్ట్రంలో మిగిలి ఉన్న ఇతర బొగ్గు బ్లాకులను కూడా సంస్థకే కేటాయించాల్సిందిగా కేంద్ర ప్రభుత్వానికి ఈ సందర్భంగా విజ్ఞప్తి చేశారు.
