- కాళేశ్వరం విధ్వంసానికి కేసీఆర్ బాధ్యత వహించాలి
- కాళేశ్వరం రీడిజైన్తో ఖర్చు పెరిగిందని విమర్శ
- నాణ్యతా లోపాలతోనే బ్యారేజీలు దెబ్బతిన్నాయని వ్యాఖ్య
- ప్రాజెక్టు పునరుద్ధరణకు నిపుణులతో చర్యలు చేపడుతున్నామని వెల్లడి
- అసెంబ్లీలో కాళేశ్వరంపై సమగ్ర చర్చకు సిద్ధమని ప్రకటన
హైదరాబాద్ వెలుతురు జూలై 07:
ప్రజాభవన్లో నిర్వహించిన సమావేశంలో ముఖ్యమంత్రి రేవంత్ రెడ్డి కాళేశ్వరం ప్రాజెక్టుపై బీఆర్ఎస్ నేతల విమర్శలకు ఘాటుగా స్పందించారు. కాళేశ్వరం విషయంలో చేసిన తప్పులను ఇతరులపై నెట్టి రాజకీయ ఉనికిని కాపాడుకోవాలని బీఆర్ఎస్ ప్రయత్నిస్తోందని ఆరోపించారు. ప్రాజెక్టుకు సంబంధించిన వివిధ సంస్థల నివేదికలను సమగ్రంగా ప్రజల ముందుంచిన మంత్రి ఉత్తమ్ కుమార్ రెడ్డిని అభినందించారు.
ప్రాణహిత-చేవెళ్ల ప్రాజెక్టును కాంగ్రెస్ ప్రభుత్వం 16.40 లక్షల ఎకరాలకు సాగునీరు అందించాలనే లక్ష్యంతో ప్రారంభించిందని సీఎం గుర్తు చేశారు. తెలంగాణ ఏర్పాటుకు ముందు ప్రాజెక్టుపై రూ.6,150 కోట్లు, ఆ తర్వాత బీఆర్ఎస్ ప్రభుత్వం మరో రూ.5,523 కోట్లు ఖర్చు చేసిందన్నారు. ఆ తర్వాత ప్రాజెక్టును రీడిజైన్ చేసి అంచనా వ్యయాన్ని రూ.38 వేల కోట్ల నుంచి రూ.81 వేల కోట్లకు పెంచారని విమర్శించారు. అయితే నీటి లభ్యత పెరగలేదని, ఆయకట్టు కూడా విస్తరించలేదని అన్నారు.
కాళేశ్వరం రీడిజైన్కు ప్రభుత్వం నియమించిన కమిటీ మేడిగడ్డ వద్ద బ్యారేజీ నిర్మాణాన్ని వ్యతిరేకిస్తూ నివేదిక ఇచ్చినా, దానిని కేసీఆర్ పక్కన పెట్టి తనకు అనుకూలంగా నివేదిక తెప్పించుకున్నారని ఆరోపించారు. ప్రణాళిక, డిజైన్, నిర్మాణం, నిర్వహణలో నాణ్యత లోపించడంతోనే నేటి పరిస్థితి వచ్చిందన్నారు.
కాళేశ్వరం ప్రారంభమైన ఏడాదిలోనే మేడిగడ్డలో సమస్యలు తలెత్తాయని, 2020లోనే మరమ్మతులు చేయాలని ఇంజినీర్లు ప్రభుత్వానికి నివేదించినా చర్యలు తీసుకోలేదన్నారు. కన్నెపల్లి పంప్హౌస్ మునిగిపోవడం, మేడిగడ్డ, అన్నారం, సుందిళ్ల బ్యారేజీల్లో ఏర్పడిన సమస్యలు ఒక్కరోజులో వచ్చినవి కావని, నిర్మాణ దశ నుంచే లోపాలు ఉన్నాయని పేర్కొన్నారు. ఈ బ్యారేజీల నిర్మాణానికి ముందు సరైన భూగర్భ పరీక్షలు కూడా నిర్వహించలేదని విమర్శించారు.
ఎన్డీఎస్ఏ నివేదికలో కూడా నాణ్యతా లోపాలు, నిర్వహణ వైఫల్యాలు, నిబంధనల ఉల్లంఘనల వల్లే బ్యారేజీలు దెబ్బతిన్నట్లు స్పష్టమైందన్నారు. లక్ష కోట్లకు పైగా ఖర్చు చేసిన ప్రాజెక్టును కాపాడేందుకు ప్రభుత్వం నిపుణులతో కలిసి పునరుద్ధరణ చర్యలు చేపడుతోందని తెలిపారు.
కాళేశ్వరంపై చర్చకు వస్తే బీఆర్ఎస్ మిడిమిడి జ్ఞానం ఉన్నవారిని పంపుతోందని ఎద్దేవా చేసిన సీఎం, కేసీఆర్ కోరిన తేదీన అసెంబ్లీ లేదా ఉభయ సభల సంయుక్త సమావేశంలో ప్రాజెక్టుపై సమగ్ర చర్చకు ప్రభుత్వం సిద్ధంగా ఉందన్నారు. స్పీకర్కు లేఖ రాసి తేదీ ఖరారు చేయాలని బీఆర్ఎస్కు సూచించారు.
తొమ్మిదిన్నరేళ్ల పాలనలో భారీ అప్పులు చేసి, కాళేశ్వరం పేరుతో లక్షల కోట్ల రూపాయలు ఖర్చు చేసినా ప్రజలకు ఉపయోగపడేలా ప్రాజెక్టును నిర్వహించలేదని ఆరోపించారు. ఇలాంటి విధ్వంసానికి కారణమైన కేసీఆర్, కేటీఆర్, హరీశ్రావులను “ఆర్థిక ఉగ్రవాదులు”గా అభివర్ణించారు.
కేసీఆర్ చేసిన తప్పులకు తెలంగాణ ప్రజలు శిక్ష అనుభవించకూడదని స్పష్టం చేసిన సీఎం, ప్రజలకు ఉపయోగపడే నిర్మాణాలు, సంక్షేమ పథకాలను తమ ప్రభుత్వం కొనసాగిస్తోందన్నారు. ప్రజల ప్రయోజనమే ప్రభుత్వానికి ప్రధానమని రేవంత్ రెడ్డి పేర్కొన్నారు.
