ఆసియా పారా గేమ్స్‌లో స్వర్ణం.. దీప్తికి అభినందనలు
హైదరాబాద్, వెలుతురు, అక్టోబర్ 20 : జపాన్‌లో జరుగుతున్న ఆసియా పారా గేమ్స్‌–2026లో మహిళల 400 మీటర్ల (టీ-20) పరుగుపందెంలో స్వర్ణ పతకం సాధించిన తెలంగాణ క్రీడాకారిణి దీప్తి జీవంజికి టీపీసీసీ అధ్యక్షులు, ఎమ్మెల్సీ మహేష్ కుమార్ గౌడ్ హృదయపూర్వక అభినందనలు తెలిపారు.
56.36 సెకన్లలో లక్ష్యాన్ని చేరుకుని రికార్డు సృష్టిస్తూ దీప్తి జీవంజి సాధించిన ఈ ఘన విజయం తెలంగాణకే కాకుండా దేశానికే గర్వకారణమని మహేష్ కుమార్ గౌడ్ పేర్కొన్నారు. అంతర్జాతీయ క్రీడా వేదికపై తెలంగాణ ప్రతిభను చాటిన దీప్తి.. దేశవ్యాప్తంగా ఉన్న పారా అథ్లెట్లు, యువ క్రీడాకారులకు స్ఫూర్తిగా నిలిచారని కొనియాడారు.
పట్టుదలతో లక్ష్య సాధన
ఎదురయ్యే అడ్డంకులను అధిగమిస్తూ పట్టుదల, ఆత్మవిశ్వాసం, నిరంతర శ్రమతో అనుకున్న లక్ష్యాలను సాధించవచ్చని దీప్తి తన విజయంతో నిరూపించారని మహేష్ కుమార్ గౌడ్ అన్నారు.
దేశ కీర్తిని ఇనుమడింపజేయాలి
దీప్తి జీవంజి భవిష్యత్తులో మరిన్ని విజయాలు సాధించి, అంతర్జాతీయ స్థాయిలో భారతదేశ కీర్తిప్రతిష్ఠలను మరింత ఇనుమడింపజేయాలని ఆయన ఆకాంక్షించారు. ఆమె క్రీడా ప్రస్థానం మరెందరో యువతకు ప్రేరణగా నిలవాలని అభిలషించారు.
