ప్రభుత్వానికి తెలంగాణ రాష్ట్ర కాంట్రాక్టర్స్‌ అసోసియేషన్‌ హెచ్చరిక
హైదరాబాద్‌, వెలుతురు, అక్టోబర్ 22
కాంట్రాక్టర్లకు ప్రభుత్వం వెంటనే పెండింగ్‌ బిల్లులు చెల్లించాలని తెలంగాణ రాష్ట్ర కాంట్రాక్టర్స్‌ అసోసియేషన్‌ డిమాండ్‌ చేసింది. గత నాలుగేళ్లుగా బిల్లులు చెల్లించకపోవడంతో రాష్ట్రవ్యాప్తంగా వేలాది మంది కాంట్రాక్టర్లు తీవ్ర ఆర్థిక సంక్షోభంలో కూరుకుపోయారని ఆందోళన వ్యక్తం చేసింది. పూర్తిచేసిన అభివృద్ధి పనులకు చెల్లింపులు నిలిపివేయడం వల్ల బ్యాంకు రుణాలు, వడ్డీలు, జీఎస్టీ, ఇతర పన్నులు, మెటీరియల్‌ సరఫరాదారుల బకాయిలు, కార్మికుల జీతాలు చెల్లించలేక ఇబ్బందులు పడుతున్నారని పేర్కొంది. ముఖ్యంగా చిన్న, మధ్యతరహా కాంట్రాక్టర్ల కుటుంబాలు జీవనోపాధి కోల్పోయే పరిస్థితి ఏర్పడిందని తెలిపింది.
ప్రభుత్వం ప్రత్యేక నిధులు కేటాయించి పెండింగ్‌ బిల్లులన్నింటినీ విడుదల చేయాలని, ముఖ్యమంత్రి స్వయంగా జోక్యం చేసుకుని సమస్యకు శాశ్వత పరిష్కారం చూపాలని అసోసియేషన్‌ కోరింది. బిల్లుల చెల్లింపునకు స్పష్టమైన కాలపట్టిక ప్రకటించి, వారం రోజుల్లోగా చెల్లింపులు ప్రారంభించాలని డిమాండ్‌ చేసింది. ప్రభుత్వం స్పందించకపోతే సచివాలయం, జిల్లా కలెక్టర్‌ కార్యాలయాల ముట్టడి, ధర్నాలు, రాస్తారోకోలు సహా రాష్ట్రవ్యాప్తంగా భారీ నిరసన కార్యక్రమాలు చేపడతామని హెచ్చరించింది. సమస్య పరిష్కారం కాకపోతే ఉద్యమాన్ని మరింత ఉధృతం చేస్తామని స్పష్టం చేసింది.
