హైదరాబాద్, వెలుతురు, ఆగస్టు 31:
‘టాక్సిక్’ సినిమాపై గోషామహల్ ఎమ్మెల్యే రాజాసింగ్ తీవ్ర వ్యాఖ్యలు చేశారు. సినిమాలో అశ్లీలత ఎక్కువగా ఉందని ఆయన విమర్శించారు. స్నేహితులతో కలిసి సినిమాకు వెళ్లిన తాను, కొన్ని అభ్యంతరకర సన్నివేశాలను చూసిన అనంతరం మధ్యలోనే థియేటర్ నుంచి బయటకు వచ్చానని తెలిపారు.
సినిమా కేవలం వినోదానికే పరిమితం కాకుండా సమాజానికి ఏదో ఒక మంచి సందేశాన్ని అందించేలా ఉండాలని రాజాసింగ్ అభిప్రాయపడ్డారు. అయితే ‘టాక్సిక్’ సినిమాలో డ్రగ్స్, హత్యలు, మహిళలను అసభ్యకరంగా చూపించే సన్నివేశాలు మినహా సమాజానికి ఉపయోగపడే సందేశం పెద్దగా కనిపించలేదని పేర్కొన్నారు.
‘ఇరుముడి’లో మంచి సందేశం
ఇతర సినిమాలను ఉదాహరణగా ప్రస్తావించిన రాజాసింగ్ ప్రముఖ నటుడు రవితేజ నటించిన ‘ఇరుముడి’ సినిమాలో మంచి సందేశం ఉందని అన్నారు. దైవ సంబంధమైన అంశాలకు ప్రాధాన్యం ఇచ్చే సినిమాలు ప్రేక్షకులపై సానుకూల ప్రభావం చూపుతాయని పేర్కొన్నారు.
‘ఛావా’లో ధార్మిక విలువలకు ప్రాధాన్యం
‘ఛావా’ సినిమాను కూడా రాజాసింగ్ ప్రస్తావించారు. హిందూ ధర్మానికి సంబంధించిన పలు అంశాలను సినిమాలో చూపించారని, ధార్మిక విలువలను కాపాడే విధంగా కథను తెరకెక్కించారని అన్నారు.
యష్కు రాజాసింగ్ సూచనలు
‘టాక్సిక్’ చిత్రంలో నటించిన హీరో యష్కు రాజాసింగ్ పలు సూచనలు చేశారు. ఇలాంటి సినిమాల్లో నటించడం వల్ల భవిష్యత్తులో చెడ్డ పేరు వచ్చే అవకాశం ఉందని, ఇకపై కథలను ఎంపిక చేసుకునే విషయంలో మరింత జాగ్రత్తగా వ్యవహరించాలని సూచించారు.
సినీ హీరోలకు భారీ సంఖ్యలో అభిమానులు ఉన్నందున తమ సినిమాలు సమాజంపై ఎలాంటి ప్రభావం చూపుతాయనే అంశాన్ని కూడా వారు పరిగణనలోకి తీసుకోవాలని రాజాసింగ్ కోరారు. ‘టాక్సిక్’ సినిమాపై రాజాసింగ్ చేసిన ఈ వ్యాఖ్యలు సినీ, రాజకీయ వర్గాల్లో చర్చకు దారితీశాయి.
