వరుసగా మూడో రోజు నష్టాల్లోనే…
ముంబై, వెలుతురు, అక్టోబర్ 22 :
దేశీయ స్టాక్ మార్కెట్లలో నష్టాల పరంపర కొనసాగుతోంది. అంతర్జాతీయ మార్కెట్లో ముడి చమురు ధరలు పెరగడంతో ద్రవ్యోల్బణంపై ఆందోళనలు పెరిగాయి. దీంతో సూచీలు వరుసగా మూడో రోజూ నష్టాల్లో ముగిశాయి. గురువారం బీఎస్‌ఈ సెన్సెక్స్ 460.30 పాయింట్లు పడిపోయి 73,249.39 వద్ద స్థిరపడింది. ఎన్ఎస్ఈ నిఫ్టీ 123.70 పాయింట్లు క్షీణించి 22,687.65 వద్ద ముగిసింది.
మార్కెట్లో అమ్మకాల ఒత్తిడి ప్రధాన రంగాలపై ప్రభావం చూపింది. ఐటీ, ఎఫ్ఎంసీజీ, మీడియా షేర్లు ఎక్కువగా నష్టపోయాయి. అయితే మార్కెట్ మొత్తం బలహీనంగా ఉన్నప్పటికీ ఫార్మా రంగం మాత్రం సానుకూల పనితీరు కనబరిచింది. నిఫ్టీ ఫార్మా సూచీ లాభాల్లో ముగిసింది. నిఫ్టీ షేర్లలో నెస్లే ఇండియా, ఎటర్నల్, హెచ్‌డీఎఫ్‌సీ లైఫ్ ఇన్సూరెన్స్ ఎక్కువగా నష్టపోయాయి.
మిడ్‌క్యాప్, స్మాల్‌క్యాప్ షేర్లలోనూ అమ్మకాలు కొనసాగాయి. నిఫ్టీ మిడ్‌క్యాప్ 100 సూచీ 0.87 శాతం, నిఫ్టీ స్మాల్‌క్యాప్ 100 సూచీ 1.17 శాతం పడిపోయాయి. ముడి చమురు ధరలు పెరగడం వల్ల దిగుమతి వ్యయం, ద్రవ్యోల్బణ ఒత్తిళ్లు పెరిగే అవకాశం ఉందన్న ఆందోళనలు ఇన్వెస్టర్లలో నెలకొన్నాయి. దీనివల్ల భవిష్యత్తులో వడ్డీ రేట్లపై నిర్ణయాలు కూడా ప్రభావితమయ్యే అవకాశం ఉందని మార్కెట్ నిపుణులు అభిప్రాయపడ్డారు.
