పల్లె పల్లెకు సీతక్క కార్యక్రమం
ములుగు, వెలుతురు, నవంబర్ 06 :
పల్లె పల్లెకు సీతక్క కార్యక్రమంలో భాగంగా రాష్ట్ర పంచాయతీరాజ్, గ్రామీణాభివృద్ధి, గ్రామీణ నీటి సరఫరా, మహిళా శిశు సంక్షేమ శాఖల మంత్రి డాక్టర్ దనసరి అనసూయ సీతక్క ములుగు నియోజకవర్గంలోని పలు గ్రామాల్లో పర్యటించారు. రామప్ప దేవాల‌యంలో ప్ర‌త్యేక పూజ‌లు చేసిన అనంత‌రం పల్లె పల్లెకు కార్యక్రమంలో పాల్గోన్నారు.
గ్రామాలకు చేరుకున్న మంత్రికి కాంగ్రెస్ పార్టీ నాయకులు, కార్యకర్తలు ఘన స్వాగతం పలికారు. కార్యకర్తల కోలాహలం మధ్య పలు గ్రామాల్లో కాంగ్రెస్ పార్టీ జెండాలను ఆవిష్కరించిన మంత్రి ప్రజలతో మమేకమయ్యారు. గ్రామాల్లో ప్రభుత్వం అమలు చేస్తున్న అభివృద్ధి, సంక్షేమ కార్యక్రమాలను వివరించారు. ప్రజల సమస్యలను అడిగి తెలుసుకుని, వాటి పరిష్కారానికి సంబంధిత అధికారులకు సూచనలు చేశారు.
ఈ సందర్భంగా మంత్రి సీతక్క మీడియాతో మాట్లాడుతూ.. కాళేశ్వరం ప్రాజెక్టు నిర్మాణంలో జరిగిన అవకతవకలు, అవినీతి కారణంగానే నిర్మాణం పూర్తయిన కొద్ది కాలానికే బ్యారేజీ దెబ్బతిన్నదని విమర్శించారు. లక్షల కోట్ల ప్రజాధనంతో నిర్మించిన ప్రాజెక్టు పరిస్థితి నేడు ఎలా ఉందో ప్రజలకు తెలుసన్నారు. కాళేశ్వరం చుట్టూ రాజకీయాలు చేయడం మానేసి, ప్రాజెక్టు విషయంలో వాస్తవాలను బీఆర్ఎస్ నాయకులు ప్రజలకు వివరించాలని అన్నారు.
కాళేశ్వరం వద్ద నీటిని నిల్వ చేయడం వల్ల ప్రమాదం ఉందని కేంద్ర డ్యామ్ సేఫ్టీ అధికారులు సూచించారని మంత్రి తెలిపారు. కన్నాయిగూడెం, ఏటూరునాగారం, వాజేడు, వెంకటాపురం ప్రాంతాలతో పాటు పినపాక, భద్రాద్రి ప్రాంతాలకు వ‌ర‌ద ముప్పు ఏర్పడే అవకాశం ఉందని అధికారులు హెచ్చరించిన నేపథ్యంలోనే అక్కడ నీటి నిల్వ విషయంలో జాగ్రత్తలు తీసుకుంటున్నామని వివరించారు. డ్యామ్ సేఫ్టీ అధికారుల సూచనలకు అనుగుణంగానే చర్యలు చేపడుతున్నామని స్పష్టం చేశారు.
గోదావరి జలాలను వృథా కాకుండా వివిధ మార్గాల ద్వారా అవసరమైన ప్రాంతాలకు తరలిస్తున్నామని సీతక్క తెలిపారు. దేవాదుల, తుపాకులగూడెం ప్రాజెక్టుల ద్వారా నీటిని వినియోగించుకునే చర్యలు చేపడుతున్నామని, నీటి ప్రవాహం అధికంగా ఉన్నప్పుడు సీతారామ ప్రాజెక్టులో నీటిని నింపుతూ అవసరమైన విధంగా వినియోగిస్తున్నామని చెప్పారు. రామప్ప చెరువును నింపడంతో పాటు, అక్కడి నుంచి పరిసర ప్రాంతాల మండలాలకు నీటిని అందించే ప్రయత్నం చేస్తున్నామని తెలిపారు. ములుగు జిల్లాలో తాగునీరు, సాగునీటి అవసరాలు ఉన్న ప్రాంతాలకు ప్రాధాన్యత ఇవ్వాలన్నదే ప్రభుత్వ విధానమని పేర్కొన్నారు.
దేవాదుల ప్రాజెక్టు ద్వారా నర్సంపేట, పాలకుర్తి, జనగాం, స్టేష‌న్ ఘ‌న్ పూర్ తదితర నియోజ‌వ‌క‌ర్గాల‌కు కూడా నీటిని తరలిస్తున్నామని తెలిపారు. గోదావరిలో లభ్యమయ్యే ప్రతి నీటి చుక్కను ఒడిసిపట్టి రైతులకు, ప్రజలకు ఉపయోగపడేలా ప్రభుత్వం చర్యలు తీసుకుంటోందని వివరించారు. నీటి నిర్వహణకు సంబంధించిన వాస్తవ పరిస్థితులను తెలుసుకోకుండా ప్రభుత్వంపై విమర్శలు చేయడం సరికాదన్నారు.
దేశంలోని అనేక ప్రాంతాలతో పాటు రాష్ట్రంలోనూ వర్షాభావ పరిస్థితులు నెలకొన్నాయని, ఇది ప్రకృతిలో వచ్చిన మార్పుల ఫలితమని మంత్రి పేర్కొన్నారు. ఇలాంటి క్లిష్ట పరిస్థితుల్లోనూ రైతులు, పేదలకు అండగా నిలవాలన్నదే ముఖ్యమంత్రి రేవంత్ రెడ్డి ఆలోచన అని చెప్పారు. ప్రజల వద్దకు వెళ్లి వారి సమస్యలు, ఇబ్బందులను స్వయంగా తెలుసుకుని పరిష్కారానికి చర్యలు తీసుకోవాలన్న ముఖ్యమంత్రి ఆదేశాలకు అనుగుణంగా క్షేత్రస్థాయిలో పర్యటిస్తున్నామని తెలిపారు.
సన్న వడ్ల సాగు విషయంలో గతంలో బీర్ఎస్ అనేక విమర్శలు చేసినప్పటికీ, నేడు సన్నబియ్యాన్ని ప్రజలకు అందించే స్థాయికి రాష్ట్రం చేరుకుందని మంత్రి గుర్తుచేశారు. రైతులు పండించే పంటకు గిట్టుబాటు, ప్రజలకు నాణ్యమైన ఆహారం అందించడం రెండింటికీ ప్రభుత్వం ప్రాధాన్యత ఇస్తోందన్నారు. రైతుల కష్టాలను గుర్తించి, వారికి అవసరమైన సహకారం అందించేందుకు ప్రజా ప్రభుత్వం కట్టుబడి ఉందని మంత్రి సీతక్క స్పష్టం చేశారు.
