ఎల్‌నినో ప్రభావంపై కేంద్ర ఆర్థిక సాయం కోరనున్న తెలంగాణ
హైదరాబాద్‌, వెలుతురు, నవంబర్ 13 :
ఎల్‌నినో ప్రభావంతో రాష్ట్రంలో నెలకొన్న వర్షాభావం, కరువు పరిస్థితులను ఎదుర్కొనేందుకు తెలంగాణ ప్రభుత్వం కేంద్ర ఆర్థిక సాయం కోరనుంది. ఈ నెల 15న ముఖ్యమంత్రి ఎ. రేవంత్‌రెడ్డి, నీటిపారుదల, పౌరసరఫరాల శాఖ మంత్రి కెప్టెన్‌ ఎన్‌. ఉత్తమ్‌కుమార్‌రెడ్డి ప్రధానమంత్రి నరేంద్ర మోదీతో సమావేశం కానున్నారు. ఈ సందర్భంగా రాష్ట్రంలో వర్షపాతం లోటు, కరువు పరిస్థితులు, వ్యవసాయ రంగంపై వాటి ప్రభావాన్ని ప్రధాని దృష్టికి తీసుకెళ్లనున్నారు. వర్షాభావంతో రైతులు ఎదుర్కొంటున్న ఇబ్బందులు, గ్రామీణ ప్రాంతాల్లో జీవనోపాధిపై పడుతున్న ప్రభావాన్ని వివరించి, కరువు ప్రభావిత ప్రాంతాల్లో సహాయక చర్యల కోసం తగిన ఆర్థిక సాయం అందించాలని కోరనున్నారు. రైతులు, గ్రామీణ కుటుంబాలకు సకాలంలో ఉపశమనం కల్పించేందుకు కేంద్ర, రాష్ట్ర ప్రభుత్వాల సమన్వయంతో చేపట్టాల్సిన చర్యలపైనా చర్చించనున్నారు.
