జగన్ కుటుంబ మహిళలపై అనుచిత పోస్టులు

జగన్ కుటుంబ మహిళలపై అనుచిత పోస్టులు

 

అమరావతి, వెలుతురు, నవంబర్ 15 :  వైసీపీ అధినేత జగన్ కుటుంబ సభ్యులపై సోషల్ మీడియా వేదికగా జుగుప్సాకర వ్యాఖ్యలు చేయడాన్ని ఆంధ్రప్రదేశ్ రాష్ట్ర మహిళా కమిషన్ చైర్‌పర్సన్ రాయపాటి శైలజ తీవ్రంగా ఖండించారు. మహిళలను కించపరిచేలా అనుచిత పోస్టులు పెట్టడం అత్యంత దారుణమని ఆమె పేర్కొన్నారు. ఈ మేరకు ఆమె ఒక ప్రకటన విడుదల చేశారు.

 

రాజకీయ కక్షలు లేదా విభేదాల పేరుతో మహిళలను లక్ష్యంగా చేసుకోవడం సరికాదని రాయపాటి శైలజ స్పష్టం చేశారు. “ట్విట్టర్‌ వేదికగా మహిళలను కించపరిచేలా వ్యాఖ్యలు చేయడం అత్యంత హేయమైన చర్య” అని ఆమె మండిపడ్డారు. రాజకీయాల పేరుతో మహిళలను అవమానించడం, వారి వ్యక్తిత్వ హననానికి పాల్పడడం ఏమాత్రం మంచిది కాదని ఆమె ఆగ్రహం వ్యక్తం చేశారు. మహిళల పట్ల అసభ్యంగా మాట్లాడే ధోరణిని ఎట్టిపరిస్థితుల్లోనూ ఉపేక్షించబోమని తేల్చిచెప్పారు.