భారత్-జపాన్ బంధంలో చారిత్రాత్మక మైలురాయి
రక్షణ రంగంలో తొలిసారి ఉమ్మడి ప్రాజెక్ట్
సరికొత్త శిఖరాలకు ద్వైపాక్షిక వ్యూహాత్మక మైత్రి
పరస్పర నమ్మకమే మన అతిపెద్ద వ్యూహాత్మక ఆస్తి
భారత్-జపాన్ 16వ వార్షిక సదస్సులో ప్రధాని మోదీ వ్యాఖ్యలు
జపాన్ తొలి మహిళా ప్రధాని తకాయిచి నా చెల్లెలు
నారా ప్రాంత ఉమ్మడి బౌద్ధ వారసత్వాన్ని గుర్తుచేసిన మోదీ
ఏఐ, సరికొత్త సాంకేతికత కోసం ఉమ్మడి విజన్ ఆవిష్కరణ
భారత్కు భారీగా జపాన్ పెట్టుబడులు
120 నూతన వ్యాపార ఒప్పందాలతో 10 బిలియన్ డాలర్ల రాక
రానున్న దశాబ్ద కాలంలో జపాన్ కంపెనీల సంఖ్య రెట్టింపు
10 ట్రిలియన్ల పెట్టుబడులే లక్ష్యంగా ముందడుగు
ఫార్మా, వైద్య రంగాల్లో చేతులు కలిపిన ఇరు దేశాలు
ఢిల్లీ వెలుతురు జూలై 02:
భారతదేశం, జపాన్ దేశాల మధ్య దశాబ్దాలుగా కొనసాగుతున్న అంతర్జాతీయ స్నేహ బంధం సరికొత్త స్థాయికి చేరుకుంది. దిల్లీ వేదికగా నిర్వహించిన భారత్-జపాన్ 16వ వార్షిక శిఖరాగ్ర సదస్సులో రెండు దేశాల అగ్రనేతలు పాల్గొని ద్వైపాక్షిక సంబంధాలపై కీలక ప్రకటనలు చేశారు. ఈ సందర్భంగా భారత ప్రధానమంత్రి నరేంద్ర మోదీ మాట్లాడుతూ, ప్రస్తుత అంతర్జాతీయ పరిణామాల నేపథ్యంలో రెండు దేశాల మధ్య ఉన్న ‘పరస్పర విశ్వాసమే’ అన్నిటికంటే అతిపెద్ద వ్యూహాత్మక ఆస్తి అని అభివర్ణించారు. ప్రపంచ సంక్షోభ సమయాల్లో ఇరు దేశాల నమ్మకం మరింత బలపడిందని ఆయన స్పష్టం చేశారు.
వార్షిక శిఖరాగ్ర సమావేశం కోసం భారత్కు విచ్చేసిన జపాన్ ప్రధాని సనాయె తకాయిచికి ప్రధాని మోదీ ఘనస్వాగతం పలికారు. ఆమెను తన ‘చెల్లెలు’ అని ఆత్మీయంగా సంబోధిస్తూ ప్రత్యేక గౌరవాన్ని చాటారు. జపాన్ దేశానికి మొట్టమొదటి మహిళా ప్రధానమంత్రిగా ఎన్నికైన సనాయె తకాయిచి ఎంతో దూరదృష్టి కలిగిన, ప్రజాదరణ పొందిన లీడర్ అని ప్రధాని కొనియాడారు. ఆమె ప్రాతినిధ్యం వహిస్తున్న జపాన్లోని నారా ప్రాంతం, భారతదేశంతో ముడిపడి ఉన్న ఉమ్మడి బౌద్ధ సాంస్కృతిక వారసత్వానికి ఒక చారిత్రాత్మక కేంద్రంగా నిలిచిందని మోదీ గుర్తుచేశారు.
ఈ చారిత్రాత్మక సదస్సులో రక్షణ రంగానికి సంబంధించి ఒక అద్భుతమైన నిర్ణయం తీసుకున్నారు. భారత్, జపాన్ దేశాలు తమ రక్షణ చరిత్రలోనే మొట్టమొదటి సారిగా ఒక ఉమ్మడి ప్రాజెక్టును చేపట్టేందుకు చారిత్రాత్మక ఒప్పందం కుదుర్చుకున్నాయని ప్రధాని మోదీ వెల్లడించారు. దీనితో పాటు భవిష్యత్ అంతర్జాతీయ అవసరాలను దృష్టిలో ఉంచుకుని ఆర్టిఫిషియల్ ఇంటెలిజెన్స్, అత్యాధునిక సాంకేతిక పరిజ్ఞానంలో సరికొత్త భాగస్వామ్యం కోసం ఇరు దేశాల ప్రతినిధులు ఒకే ఉమ్మడి విజన్ పత్రాన్ని ఆవిష్కరించారు. ఇది ప్రపంచ వ్యూహాత్మక రంగంలో కొత్త అధ్యాయానికి నాంది పలుకుతుందని మోదీ ఆశాభావం వ్యక్తం చేశారు.
గడచిన కొద్ది కాలంలో భారత్-జపాన్ దేశాల మధ్య ఆర్థిక, పెట్టుబడి భాగస్వామ్యం ఊహించని రీతిలో వేగవంతంగా పుంజుకుందని ప్రధాని మోదీ హర్షం వ్యక్తం చేశారు. గడిచిన ఏడాది కాలంలోనే ఇరు దేశాల ప్రైవేటు, ప్రభుత్వ రంగాల మధ్య దాదాపు 120 సరికొత్త వ్యాపార ఒప్పందాలు కుదిరాయని తెలిపారు. ఈ నూతన ఒప్పందాల ద్వారా దాదాపు 10 బిలియన్ డాలర్లకు పైగా జపాన్ దేశ పెట్టుబడులు భారతదేశానికి తరలిరానున్నాయని స్పష్టం చేశారు. ఇరు దేశాల ఫైనాన్షియల్ సర్వీసెస్ ఏజెన్సీల మధ్య జరిగిన తాజా ఒప్పందం దేశంలోకి పెట్టుబడుల ప్రవాహాన్ని మరింత సులభతరం చేస్తుందని పేర్కొన్నారు.
భారతదేశంలో పెట్టుబడులు పెట్టడానికి జపాన్ పారిశ్రామికవేత్తలు ఎంతో ఆసక్తిగా ఉన్నారని, అందుకు అనుగుణంగానే భారత ప్రభుత్వం పెద్ద ఎత్తున ఆర్థిక సంస్కరణలు చేపట్టిందని సీఎం తెలిపారు. తమ తదుపరి ప్రధాన టార్గెట్ జపాన్ నుంచి భారతదేశానికి ఏకంగా 10 ట్రిలియన్ల పెట్టుబడులను ఆకర్షించడమేనని మోదీ స్పష్టం చేశారు. అలాగే రానున్న పదేళ్ల కాలంలో దేశంలో ప్రస్తుతం పనిచేస్తున్న జపాన్ కంపెనీల సంఖ్యను రెట్టింపు చేయడమే తమ ప్రభుత్వ ధ్యేయమన్నారు. దేశంలో నిరంతరాయంగా జరుగుతున్న సంస్కరణలు ‘ఈజ్ ఆఫ్ డూయింగ్ బిజినెస్’ (వ్యాపార సౌలభ్యం)ను భారీగా మెరుగుపరిచాయని, ఈ సువర్ణ అవకాశాన్ని జపాన్ కంపెనీలు సద్వినియోగం చేసుకోవాలని పిలుపునిచ్చారు.
కేవలం రక్షణ, పారిశ్రామిక రంగాలకే పరిమితం కాకుండా ప్రజా ఆరోగ్య రక్షణలో కూడా భారత్-జపాన్ దేశాలు కీలక భాగస్వామ్యం వహించనున్నాయి. ఇందులో భాగంగా ఫార్మాస్యూటికల్స్ (ఔషధాల తయారీ), అత్యాధునిక వైద్య పరికరాల ఉత్పత్తి, బయోటెక్నాలజీ రంగాలలో ఇరు దేశాల నిపుణుల మధ్య పలు కీలక ఒప్పందాలు జరిగాయి. ఈ రంగాలలో జరిగే ఉమ్మడి పరిశోధనలు, పరస్పర సహకారం కేవలం ఇరు దేశాలకే కాకుండా, అంతర్జాతీయ స్థాయిలో ప్రపంచ ఆరోగ్య భద్రతను పటిష్టం చేయడానికి ఎంతగానో దోహదపడతాయని ప్రధానమంత్రి నరేంద్ర మోదీ ఆత్మవిశ్వాసం వ్యక్తం చేశారు.
ప్రస్తుత ఆధునిక డిజిటల్ యుగంలో ఆర్థిక భద్రత, ఇంధన స్వయంసమృద్ధి అత్యంత ముఖ్యమైనవని ఇరు దేశాలు బలంగా నమ్ముతున్నాయి. అందుకోసం ఒక పటిష్టమైన ఆర్థిక భద్రత ఉమ్మడి రోడ్మ్యాప్ను సిద్ధం చేసినట్లు ప్రధాని మోదీ ప్రకటించారు. దీని ద్వారా అంతర్జాతీయంగా డిమాండ్ ఉన్న సెమీకండక్టర్ల తయారీ, క్వాంటం టెక్నాలజీ, అధునాతన మెటీరియల్స్ వంటి అత్యంత వ్యూహాత్మక రంగాల్లో గ్లోబల్ సరఫరా గొలుసు దెబ్బతినకుండా స్థిరంగా ఉండేలా ఇరు దేశాలు కలిసికట్టుగా అడుగులు వేయనున్నట్లు స్పష్టం చేశారు.
పర్యావరణ పరిరక్షణ మరియు ఇంధన భద్రత కోసం భారత్-జపాన్ బయోగ్యాస్ చొరవకు ఇరు దేశాల నేతలు ఆమోదం తెలిపారు. ఈ ప్రతిష్టాత్మక ప్రాజెక్ట్ కింద భారతదేశం అంతటా సుమారు 1000 సరికొత్త బయోగ్యాస్ మరియు సేంద్రియ ఎరువుల ప్లాంట్లను స్థాపించనున్నారు. జపాన్ సాంకేతికతతో ఏర్పాటు కానున్న ఈ ప్లాంట్లు భారత ప్రభుత్వం ప్రతిష్టాత్మకంగా చేపట్టిన ‘గోబర్ధన్’ కార్యక్రమానికి మరింత బలాన్ని చేకూరుస్తాయని ప్రధాని తెలిపారు. ఈ వినూత్న చర్య ద్వారా భారతీయ గ్రామాలలో పర్యావరణ సుస్థిరత పెరగడమే కాకుండా, గ్రామీణ ప్రజల ఆర్థిక శ్రేయస్సుకు, వారి జీవనోపాధికి సరికొత్త ఊపు లభిస్తుందని ప్రధాని మోదీ ఆశాభావం వ్యక్తం చేశారు.
