హైదరాబాద్ : ఓటర్ల హక్కులను హరిస్తున్న బీజేపీ కుట్రలను అడ్డుకోవాలని మంత్రి పొన్నం ప్రభాకర్ అన్నారు. ఓటర్ల జాబితాలో అక్రమాలు, అర్హులైన ఓటర్ల తొలగింపుపై తీవ్ర అభ్యంతరం వ్యక్తం చేశారు. ఓటర్ల హక్కుల పరిరక్షణ కోసం దేశవ్యాప్తంగా కాంగ్రెస్ పోరాటం చేస్తోందన్నారు. రాహుల్‌ గాంధీ నాయకత్వంలో ఇండియా కూటమి ప్రజాస్వామ్యబద్ధంగా పోరాడుతోందని, శాంతియుతంగా నిరసన తెలుపుతున్న ప్రతిపక్ష నాయకులను అరెస్టు చేయడం అప్రజాస్వామికమని పేర్కొన్నారు. రాహుల్‌ గాంధీ అరెస్టును తీవ్రంగా ఖండిస్తున్నట్లు తెలిపారు. ఓటు హక్కు ప్రజాస్వామ్యానికి పునాది అని, దాన్ని కాపాడుకోవాల్సిన బాధ్యత అందరిపై ఉందన్నారు. ఎస్సీ, ఎస్టీ, గిరిజనులు, మైనారిటీలు, బలహీన వర్గాల ఓటు హక్కును కాపాడుతామని స్పష్టం చేశారు. రాజ్యాంగ పరిరక్షణ కోసం కాంగ్రెస్ పార్టీ నిరంతర పోరాటం చేస్తుందని అన్నారు. స్వాతంత్ర్య ఉద్యమం నుంచి ప్రజాస్వామ్య హక్కుల కోసం పోరాడటం కాంగ్రెస్‌కు వెన్నతో పెట్టిన విద్య అని తెలిపారు. తెలంగాణలో కాంగ్రెస్ నాయకత్వంలో ఓటర్ల హక్కుల పరిరక్షణ ఉద్యమం ఉధృతంగా కొనసాగుతోందని, ఓటర్ల హక్కులను కాపాడే వరకు పోరాటం కొనసాగుతుందని చెప్పారు. ఎన్నికల వ్యవస్థపై ప్రజలకు విశ్వాసం కల్పించాల్సిన బాధ్యత ఎన్నికల కమిషన్‌పై ఉందన్నారు. ఎన్నికల కమిషన్‌ స్వతంత్రతను కాపాడాలని డిమాండ్‌ చేశారు. “ఓటు బచావో–దేశ్ బచావో” నినాదంతో ప్రజల్లోకి వెళ్తామని తెలిపారు. ఓటును కాపాడుకుందామని, రాజ్యాంగాన్ని పరిరక్షిద్దామని పిలుపునిచ్చారు. ప్రజాస్వామ్యాన్ని కాపాడేందుకు తెలంగాణ ప్రజలు ఈ ఉద్యమంలో భాగస్వాములు కావాలని మంత్రి పొన్నం ప్రభాకర్ కోరారు.
0