ఓటర్ల పేర్ల తొలగింపుపై కాంగ్రెస్ ఫిర్యాదు

 

హైదరాబాద్‌, అక్టోబర్‌ 5:

నిజమైన ఓటర్ల పేర్లను జాబితా నుంచి తొలగించేందుకు ముందుగానే సిద్ధం చేసిన ఫారం-7 దరఖాస్తులను సమర్పిస్తున్నారనే ఆరోపణలపై టీపీసీసీ ఎన్నికల సంఘం సమన్వయ కమిటీ చైర్మన్‌ పులిపాటి రాజేష్‌కుమార్‌ హైదరాబాద్‌ పోలీస్‌ కమిషనర్‌కు ఫిర్యాదు చేశారు. వెంటనే కేసు నమోదు చేసి ప్రత్యేక దర్యాప్తు బృందాన్ని ఏర్పాటు చేయాలని కోరారు.

 

ముషీరాబాద్‌ నియోజకవర్గంలో కాంగ్రెస్‌ బూత్‌ స్థాయి ఏజెంట్‌ షార్ఫుద్దీన్‌, ఆయన కుటుంబ సభ్యులు సుమారు 31 మందిపై ముందుగానే సిద్ధం చేసిన ఫారం-7లు సమర్పించినట్లు ఫిర్యాదులో పేర్కొన్నారు. ఇదే తరహాలో బహదూర్‌పురాలో అక్టోబర్‌ 1న, గోషామహల్‌లో అక్టోబర్‌ 3న ఫారం-7లు గుర్తించినట్లు తెలిపారు. గోషామహల్‌లో సుమారు 15 దరఖాస్తుల్లో సంబంధిత వ్యక్తుల సంతకాలు లేకపోవడంతో బూత్‌ స్థాయి అధికారి స్వీకరించలేదని పేర్కొన్నారు.

 

మూడు నియోజకవర్గాల్లో ఒకే తరహా దరఖాస్తులు వెలుగులోకి రావడం వెనుక సమన్వయంతో పనిచేసే వ్యవస్థ ఉందా అనే కోణంలో దర్యాప్తు చేయాలని రాజేష్‌కుమార్‌ కోరారు. దరఖాస్తులను ఎవరు సిద్ధం చేశారు, ఎక్కడ ముద్రించారు, వ్యక్తిగత ఎన్నికల సమాచారాన్ని ఎక్కడి నుంచి సేకరించారనే అంశాలను పరిశీలించాలని అన్నారు.

 

బీజేపీ రాష్ట్ర కార్యాలయం పాత్రపైనా, రాష్ట్ర అధ్యక్షుడు ఎన్‌.రామచందర్‌రావుకు ఈ వ్యవహారంపై ముందస్తు సమాచారం ఉందా అనే అంశంపైనా దర్యాప్తు చేయాలని డిమాండ్‌ చేశారు. ముషీరాబాద్‌, బహదూర్‌పురా, గోషామహల్‌ ఘటనలను అనుసంధానించి ఆధారాలు సేకరించి, ఆరోపణలు నిజమని తేలితే చట్టపరమైన చర్యలు తీసుకోవాలని కోరారు.

 

నిజమైన ఓటర్ల పేర్లను అక్రమంగా తొలగించే ప్రయత్నం జరిగితే అది ప్రజాస్వామ్య వ్యవస్థపై దాడి అవుతుందని రాజేష్‌కుమార్‌ అన్నారు. వెంటనే కేసు నమోదు చేసి ప్రత్యేక దర్యాప్తు బృందంతో సమగ్ర విచారణ చేపట్టాలని కోరారు.