కనక్కూర్‌ శ్రీ ధన్వంతరి ఆలయంలో మహాయాగానికి హాజరైన డిప్యూటీ సీఎం భట్టి విక్రమార్క
కనక్కూర్‌, వెలుతురు, అక్టోబర్‌ 27 : ఆరోగ్యమే మానవ జీవితంలో అత్యంత విలువైన సంపద అని, భారతీయ ఆయుర్వేద వారసత్వాన్ని పరిరక్షిస్తూ శాస్త్రీయ పరిశోధనలకు ప్రాధాన్యత ఇవ్వాలని తెలంగాణ ఉప ముఖ్యమంత్రి భట్టి విక్రమార్క పిలుపునిచ్చారు. కేరళంలోని కనక్కూర్‌ శ్రీ ధన్వంతరి ఆలయంలో నిర్వహించిన ధన్వంతరి మహాయాగానికి హాజరైన ఆయన, ఆరోగ్య పరిరక్షణ, ఆయుర్వేద ప్రాధాన్యత, ప్రజారోగ్యం, సామాజిక బాధ్యతలపై ప్రసంగించారు.
ఆరోగ్యం అంటే కేవలం వ్యాధులు లేకపోవడం మాత్రమే కాదని, శారీరక ఆరోగ్యం, మానసిక ప్రశాంతత, భావోద్వేగ స్థిరత్వం, సంతృప్తికరమైన జీవితం కూడా అందులో భాగమేనని భట్టి విక్రమార్క అన్నారు. నేటి వేగవంతమైన జీవనశైలిలో పెరుగుతున్న ఒత్తిళ్లను ఎదుర్కొనేందుకు ఆరోగ్యం పట్ల ప్రతి ఒక్కరూ శ్రద్ధ చూపాలని సూచించారు.
ధన్‌తేరస్‌ను బంగారం కొనుగోలు చేసే పర్వదినంగానే కాకుండా, ధన్వంతరి జయంతిగా దాని అసలైన ప్రాముఖ్యతతో గుర్తించాలని ఆయన అన్నారు. పాలసముద్ర మథనంలో అమృత కలశంతో ఆవిర్భవించిన దేవతల వైద్యుడు భగవాన్‌ ధన్వంతరి ఆరోగ్యం, జీవరక్షణకు ప్రతీకగా నిలుస్తారని పేర్కొన్నారు. ధన్వంతరిని ఆరాధించడం వ్యక్తిగత ఆరోగ్యానికే కాకుండా కుటుంబ, సమాజ శ్రేయస్సుకు కూడా ప్రతీక అని వివరించారు.
ఆయుర్వేదంలో కేరళం ప్రత్యేకం
భారతీయ వైద్య వారసత్వంలో ఆయుర్వేదానికి విశిష్ట స్థానం ఉందని, ఔషధ మొక్కలపై సంప్రదాయ పరిజ్ఞానం, ప్రత్యేక చికిత్సా విధానాలతో కేరళం దేశవిదేశాల్లో గుర్తింపు పొందిందని ఉప ముఖ్యమంత్రి పేర్కొన్నారు. ఈ ఆలయంలో 11 రోజులపాటు నిర్వహిస్తున్న ధన్వంతరి మహాయాగం ఆరోగ్య ప్రాధాన్యతను, భారతీయ వైద్య సంప్రదాయాల గొప్పతనాన్ని ప్రజల్లోకి తీసుకెళ్లడానికి దోహదపడుతుందని అన్నారు. వ్యాధుల చికిత్సతోపాటు నివారణ, సమతుల్యమైన జీవనశైలి, సరైన ఆహారం, ప్రకృతితో సామరస్యంగా జీవించడం వంటి అంశాలకు సంప్రదాయ వైద్య విధానాలు ప్రాధాన్యతనిచ్చాయని గుర్తుచేశారు. అయితే ఆయుర్వేదాన్ని బాధ్యతాయుతంగా ఆచరిస్తూ, శాస్త్రీయ పరిశోధనలను ప్రోత్సహించాలని, రోగులకు సురక్షితమైన వైద్య సేవలు అందేలా చూడాలని స్పష్టం చేశారు.
ప్రజారోగ్యమే అభివృద్ధికి ప్రాధాన్యం
ప్రజల ఆరోగ్యం, సంక్షేమం అభివృద్ధి విధానాల్లో ప్రధానంగా ఉండాలని అన్నారు. ఆసుపత్రులు, ప్రాథమిక ఆరోగ్య కేంద్రాలు, వైద్య విద్య, పరిశోధన, వ్యాధుల నివారణ, ప్రజారోగ్య అవగాహన కార్యక్రమాలకు నిరంతర పెట్టుబడులు అవసరమని పేర్కొన్నారు. అనారోగ్యంతో బాధపడుతున్నవారికి, వైద్య ఖర్చులు భరించలేని కుటుంబాలకు సమాజం అండగా నిలవాలని పిలుపునిచ్చారు. వృద్ధులు, దివ్యాంగులు, బలహీన వర్గాల పట్ల సానుభూతితో వ్యవహరించాలని, ప్రాణాలను కాపాడేందుకు నిరంతరం శ్రమిస్తున్న వైద్యులు, పరిశోధకులు, ఆరోగ్య కార్యకర్తల సేవలను గౌరవించాలని అన్నారు.
మన్నత్తు పద్మనాభన్‌, శ్రీ నారాయణ గురు, అయ్యంకాళి వంటి సామాజిక సంస్కర్తలు సమాజంలో జ్ఞానాన్ని విస్తరించేందుకు, ప్రతి ఒక్కరూ ఆత్మగౌరవంతో జీవించేలా కృషి చేశారని భట్టి విక్రమార్క గుర్తుచేశారు. నాయర్‌ సర్వీస్‌ సొసైటీ చేపడుతున్న కార్యక్రమాలను అభినందించారు. భారతీయ సంస్కృతి, సంప్రదాయాలను గౌరవిస్తూనే యువతలో శాస్త్రీయ దృక్పథం, నూతన ఆవిష్కరణలు, ప్రశ్నించే తత్వాన్ని పెంపొందించాలని సూచించారు. ఆరోగ్యం పర్యావరణంతో ముడిపడి ఉందని, అడవులు, ఔషధ మొక్కలు, స్వచ్ఛమైన నీరు, జీవవైవిధ్యాన్ని కాపాడుకోవడం భావితరాల శ్రేయస్సుకు అవసరమని పేర్కొన్నారు. దేశంలో శాంతి, సమాజంలో సామరస్యం నెలకొనాలని, ప్రతి కుటుంబం ఆరోగ్యంగా, సంతోషంగా జీవించాలని ఆకాంక్షించారు. ధన్వంతరి మహాయాగ నిర్వాహకులు, ఆలయ అధికారులు, స్వచ్ఛంద సేవకులు, మొదటగా విచ్చేసిన భక్తులందరికీ మలయాళంలో డిప్యూటీ సీఎం శుభాకాంక్షలు తెలిపారు.
