ఈ ఏడాది సైతం టెన్త్ విద్యార్థులందరికీ పరీక్ష ఫీజు చెల్లిస్తా : బండి
కరీంనగర్, వెలుతురు, నవంబర్ 04 : కరీంనగర్ పార్లమెంట్ నియోజకవర్గం పరిధిలోని ప్రభుత్వ పాఠశాలల్లో పదవ తరగతి చదివే విద్యార్థులందరికీ ఈ ఏడాది సైతం ఎగ్జామ్ ఫీజు చెల్లించాలని కేంద్ర హోంశాఖ సహాయ మంత్రి బండి సంజయ్ కుమార్ నిర్ణయించారు. తెలంగాణ ప్రాంత ప్రభుత్వ ఉపాధ్యాయ సంఘం(తపస్) కరీంనగర్ జిల్లా శాఖ అధ్యక్ష, ప్రధాన కార్యదర్శులు అన్నపునేని తిరుపతిరావు, జారతి నర్సయ్య 5 రోజుల క్రితం కేంద్ర మంత్రిని కలిసి ఈ మేరకు వినతి పత్రం అందజేశారు. ప్రభుత్వ పాఠశాలల్లో మౌలిక సదుపాయాలను కల్పిస్తూ వాటిని బలోపేతం చేయడం కోసం బండి సంజయ్ తీసుకుంటున్న చర్యలు అమోఘమని వారు కొనియాడారు. అందులో భాగంగా సీఎస్సార్ నిధులతోపాటు ఇతర సంస్థల సహకారంతో ప్రభుత్వ పాఠశాలల్లో అదనపు గదుల నిర్మాణం, టాయిలెట్ల నిర్మాణం చేపట్టడమే కాకుండా టెన్త్ విద్యార్థులందరికీ ఉచితంగా బ్రాండెడ్ సైకిళ్లను పంపిణీ చేసిన విషయాన్ని వారు గుర్తు చేశారు. గతేడాది టెన్త్ చదివే ప్రభుత్వ పాఠశాలల విద్యార్థులందరికీ పరీక్ష ఫీజు చెల్లించి ఆదుకున్న విషయాన్ని సైతం ప్రస్తావించారు. ప్రభుత్వ పాఠశాలల్లో చదువుకునే విద్యార్థులంతా అత్యంత పేదవారు కావడం, పరీక్ష ఫీజు చెల్లించేందుకు ఈ ఏడాది సైతం అనేక ఇబ్బందులు పడుతున్న విషయాన్ని బండి సంజయ్ ద్రుష్టికి తీసుకొచ్చారు. సానకూలంగా స్పందించిన కేంద్ర మంత్రి బండి సంజయ్ కుమార్ తన పార్లమెంట్ నియోజకవర్గ పరిధిలోని సర్కారీ స్కూళ్లలో టెన్త్ చదువుకునే విద్యార్థులందరి ఫీజును తానే చెల్లిస్తానని హామీ ఇచ్చారు. ఈ మేరకు సంబంధిత జిల్లాల డీఈఓలకు సమాచారం అందించారు. కరీంనగర్ పార్లమెంట్ పరిధిలో 10 వేల 959 మంది విద్యార్థులు ప్రభుత్వ స్కూళ్లలో పదో తరగతి చదువుకుంటున్నారు. వీరిలో రాజన్న సిరిసిల్ల జిల్లాలో 3,920, కరీంనగర్ జిల్లాలో 4,356, జగిత్యాల జిల్లాలో 1087, సిద్దిపేట జిల్లాలో 1133, హన్మకొండ 463 మంది విద్యార్థులు ఉన్నారు. బండి సంజయ్ తీసుకున్న నిర్ణయంతో వీరందరికీ ఎంతో మేలు జరగనుంది. ఆయా విద్యార్థుల ఎగ్జామ్ ఫీజు మొత్తం ఎంత అవుతుంది? అనే వివరాలను సంబంధిత జిల్లాల డీఈఓలనుండి సేకరించి రెండు, మూడు రోజుల్లో ఆ మెత్తాన్ని చెక్ రూపంలో చెల్లించాలని కేంద్ర మంత్రి నిర్ణయించడం గమనార్హం.
