తెలంగాణను వణికిస్తున్న చలి పంజా

తెలంగాణను వణికిస్తున్న చలి పంజా

హైదరాబాద్, వెలుతురు, నవంబర్ 18 : తెలంగాణ రాష్ట్రాన్ని చలి తీవ్రత క్రమంగా వణికిస్తోంది. నవంబర్ నెల మధ్యలోనే రాత్రి ఉష్ణోగ్రతలు గణనీయంగా పడిపోతుండటంతో ప్రజలు చలికి ఇబ్బందులు పడుతున్నారు. ముఖ్యంగా ఉత్తర, పశ్చిమ తెలంగాణ జిల్లాల్లో చలి ప్రభావం అధికంగా కనిపిస్తోంది. తాజాగా నమోదైన ఉష్ణోగ్రతల వివరాల ప్రకారం సంగారెడ్డి జిల్లాలో రాష్ట్రంలోనే అత్యల్పంగా 11.2 డిగ్రీల సెల్సియస్ ఉష్ణోగ్రత నమోదైంది. రంగారెడ్డిలో 11.3, కామారెడ్డిలో 11.7, వికారాబాద్‌లో 11.8, మహబూబ్‌నగర్‌లో 12 డిగ్రీల కనిష్ఠ ఉష్ణోగ్రతలు రికార్డయ్యాయి. రాష్ట్రంలోని మరో 25 జిల్లాల్లోనూ రాత్రి ఉష్ణోగ్రతలు 12 నుంచి 15 డిగ్రీల మధ్య నమోదవుతుండటం చలి తీవ్రతకు అద్దం పడుతోంది. హైదరాబాద్‌లోని గోల్కొండ ప్రాంతంలోనూ 15 డిగ్రీల కనిష్ఠ ఉష్ణోగ్రత నమోదైనట్లు వాతావరణ నివేదికలు వెల్లడించాయి. ఉదయం, రాత్రి వేళల్లోనే ఎక్కువ ప్రభావం: పగటిపూట ఎండ ఉన్నప్పటికీ సాయంత్రం నుంచి వాతావరణం చల్లబడుతోంది. తెల్లవారుజామున చలిగాలులు, కొన్ని ప్రాంతాల్లో పొగమంచు కారణంగా వాహనదారులు, మార్నింగ్ వాకర్స్ ఇబ్బందులు ఎదుర్కొంటున్నారు. చిన్నపిల్లలు, వృద్ధులు వెచ్చని దుస్తులు ధరించాల్సిన పరిస్థితి ఏర్పడింది. వ్యవసాయ పనులకు వెళ్లే రైతులు, కూలీలు సైతం ఉదయం వేళల్లో చలిని తట్టుకోవాల్సి వస్తోంది. వాతావరణంలో మార్పులకు అవకాశం : మరోవైపు బంగాళాఖాతంలో ఏర్పడిన అకవాన్ తుపాను ప్రభావంతో ఈ నెల 19, 20 తేదీల్లో రాష్ట్రంలోని కొన్ని జిల్లాల్లో ఉరుములు, మెరుపులతో కూడిన వర్షాలు కురిసే అవకాశముందని వాతావరణ నివేదికలు సూచిస్తున్నాయి. ముఖ్యంగా ఉమ్మడి ఖమ్మం, వరంగల్ ప్రాంతాల్లో వర్ష సూచన ఉండటంతో వాతావరణ పరిస్థితుల్లో మార్పులు చోటుచేసుకునే అవకాశం ఉంది.

అప్రమత్తత అవసరం: రానున్న రోజుల్లో చలి తీవ్రత మరింత పెరిగే అవకాశం ఉందన్న అంచనాల నేపథ్యంలో ప్రజలు అప్రమత్తంగా ఉండాలని సూచిస్తున్నారు. ముఖ్యంగా చిన్నారులు, వృద్ధులు తెల్లవారుజామున, రాత్రివేళల్లో చలికి నేరుగా గురికాకుండా జాగ్రత్తలు తీసుకోవాలి. పొగమంచు వేళల్లో వాహనదారులు వేగాన్ని తగ్గించి ప్రయాణించడం మంచిది. మొత్తంగా శీతాకాలం ఆరంభంలోనే తెలంగాణలో చలి తన ప్రభావాన్ని చూపిస్తుండటంతో రానున్న రోజుల్లో వాతావరణం ఎలా ఉండబోతుందన్న ఆసక్తి నెలకొంది.